Pendant deux  l’année Sithanen enlève banne acquis ek privilège ki la population ti pé jouir ; aster kan li réintroduire , li tappe so propre l’estomac et faire croire li pé kasse grand paquet.

1. Education – Pravind Jugnauth, ancien ministre finances ti introduire ene scheme pou soulage banne étudiants ki zotte parent pas ti ena moyen pou finance zotte étude tertiaire. Ziska Rs 400, 000 ou ti kapave prend comme loan sans garantie ni hypothèque di bien ou parents. Ene sous tracas pas ti bizin gagner pendant ki ou pe apprane. Six mois après ki ou fine termine ou l’étude, gouvernement paye l’intérêt lors ou loan. Ou gagne ene travail, ler la ou commence rembourse ou loan. Ala ce ki Pravind ti pe faire dans l’éducation pou donne chance égale a la population ki ou riche ki ou pauvre. L’alliance Sociale dan so premier budget, Sithanen aboli ca scheme la, zenfant pauvre pena droit gangne meme chance. Aster le revinne avec ca meme scheme la et li tappe so l’estomac, faire croire le pe aide banne zenfants pauvre. Mais la aussi li faire li mal, parceki, li pas pé paye l’intérêts pendant six mois couma ti pé faire sous plan Pravind Jugnauth.  
2. Duty Free lors 4x4 – Banne planteurs ou koné ti pe gagne facilité acheter double cab duty free pou permet zot travail dans caro. Depuis plis ki 20 ans, ca privilège la ti introduire par le MSM, Sithanen encore ene fois so le cœur faire mal kan li trouve banne ti planteur pe gagne ene l’avantage, li aboli ca privilège la dans so budget 2 ans de cela. Aster li réintroduire  ca privilège la, et li tappe so l’estomac ek rode faire croire li pe faire ti planteur ene faveur. Encore ene fois li pas fine redonne les meme privilèges parceki, ou bizin acheter double cab sans so caisson, ca veut dire plis dépenses pou acheteur.   Li prend après li donner mais li pas  donne ou tout ce ki ou ti ena droit comme avant. Mais li rode faire croire ki li fine kasse ene grand paquet. Li pas arrête la, Sithanen donne ou duty free lors 4x4 mais en meme temps road tax augmente par Rs. 5, 000 plus ene levy 10 sous lors chaque litre diesel, essence ek gaz ki ou pou acheter.
3. Pouvoir d’achat – Sithanen faire croire avec rapport PRB, tout mauricien zot pouvoir d’achat fine améliorer. Ena zis 20% population active concerné par PRB, 80% travail dans secteur privé et fine gagne zis Rs 10 augmentation par jour. Pou Sithanen travailleur secteur privé pas bizin mangé. Li baisse duty lors canard dans boite ek caviar plus produit maquillage et li dire mauricien pou dans corek avec ca budget la pou kapave joindre zot fin du mois.
4. Combattre la pauvreté – Sithanen avoué ki li fine crée la pauvreté extrême dan Maurice, ek li meme vine dire ki ena 7, 157 famille dans sa catégorie la. Li fine vote Rs 395M pou combat la pauvreté et ca représente Rs 153 par jour pou chaque famille. Anou attane pou guetté comment la pauvreté pou reculé dan pays. Ou pou rappelle comment ancien gouvernement avec Trust Fund pou intégration banne groupe vulnérable ti pe soulage banne mauriciens en difficulté, mais l’Alliance Sociale ti bloque fonctionnement Trust Fund avec résultat azordi beaucoup mauricien pe vivre dans banne conditions extrême. Sithanen pe donne par milliards dans secteur privé et Rs 153 pou banne pauvre.
5. Manipulation ek Mensonge Sithanen – Fidele a li meme, Sithanen koz ene tas chiffre pou embrouille la population ek faire croire ki tou korek depi ki li ministre finances. Beaucoup banne chiffre mentioné dans so budget 2008/09 pas vrai par exemple lors croissance, taux d’épargne, déficit budgétaire, chômage, FDI etc. Pareil li fine manipule banne dépenses entre deux années financière pou faire croire ki li pe baisse déficit budgétaire. Zamais avant ene ministre finance fine passe ene dépense pou l’année suivante dans l’année ki pe terminé comme ene Estimated Supplementary Expenditure (ESE). Par so l’arrogance ek so faiseur d’esprit li pe rode kouyonne la population.
6. Project infrastructure – Sithanen fine annonce ene la liste projet infrastructure au cout par milliards. Ca banne projets comment ponts, la route, tunnel, bus lane etc. ti annoncé en 2006 et 2007 mais fine reste zis dans discours budget. 2010 pou arrivé, nou pou trouve pont zis dan rêve mais pas dans réalité. L’année dernière dans budget capital, ti vote Rs 10 Milliard mais fine dépense zis Rs 3 Milliard.
7. Law & Order – Pena aucun mesure solide pou combat la criminalité
8. Sport – Zéro plombage pou banne jeunesse.
9. La Santé – Pena aucun nouveauté pou améliore service la santé alors ki nou koné comment ena beaucoup maladie ki alarmant dans pays.

Conclusion

Sithanen pe dire ki l’année 2008/09 pou ene bumber crop, mais li clair ki li pas pe vivre dans Maurice, après so budget li alle passe so weekend dans banne l’hôtel 5 étoiles, 2006 li ti alle St Geran, 2007 Hôtel Paradis et 2008 Touessrock.  So banne copains fréquente ca banne l’endroit la alors ki la population pas pe gagne du riz ration ek pe gagne la farine avariés. La vie pou en rose pou Sithanen ek so banne copains mais la population pou continué vivre ene cauchemar avec politique Sithanen.